AYITI: DEKRÈ ELEKTORAL LA LAKOZ GWO TANSYON! DAPRE MÉTRONOME, KOMINOTE ENTÈNASYONAL LA FACHE KONT ALIX DIDIER FILS-AIMÉ

Yon gwo tansyon diplomatik ap devlope sou kesyon òganizasyon eleksyon ann Ayiti, apre otorite ki sou pouvwa yo fin modifye dekrè elektoral la semèn pase a.

Dapre enfòmasyon medya Métronome rapòte, kominote entènasyonal la pa dakò ak desizyon pou retire dispozisyon ki te entèdi moun Etazini, Kanada ak Inyon Ewopeyen an sanksyone patisipe nan eleksyon yo.

Selon menm sous la, kèk aktè entènasyonal konsidere nouvo dekrè a kòm yon « dekrè lawont », paske li ouvri pòt pou pèsonalite ki anba sanksyon entènasyonal antre nan konpetisyon elektoral la.

Métronome fè konnen yon sous diplomatik konfye li kominote entènasyonal la santi Premye Minis Alix Didier Fils-Aimé twonpe li. Dapre sous sa a, chèf gouvènman an te bay garanti, pandan plizyè rankont ak patnè entènasyonal yo, moun ki anba sanksyon pa t ap kapab patisipe nan pwosesis elektoral la.

Sous diplomatik la fè konnen piblikasyon yon rapò Nasyonzini, yon jou apre dekrè a, reprezante yon dezavou pou Premye Minis la.

Toujou dapre enfòmasyon Métronome pibliye, sitiyasyon sa a mete avni politik Alix Didier Fils-Aimé anba gwo presyon. Sous la estime peyi a kapab antre nan yon lòt peryòd tranzisyon politik.

Kesyon ki poze kounye a konsène avni dekrè elektoral la, posibilite pou òganize eleksyon yo ak konsekans dezakò sa a sou estabilite politik peyi a.

Pou kounye a, deklarasyon sou pozisyon kominote entènasyonal la, yon posib nouvo tranzisyon ak avni Premye Minis la soti nan enfòmasyon Métronome atribye ak yon sous diplomatik. Yo pa reprezante yon desizyon ofisyèl ki deja anonse.

Haitian Info TV ap kontinye suiv evolisyon dosye elektoral la ak reyaksyon otorite ayisyen yo ansanm ak patnè entènasyonal yo.

Sous ;metronome