FRÈ LUCKSON DEMANTI ENFÒMASYON KI FÈ KONNEN DCPJ TE KONVOKE L SOU DOSYE OTAJ KENSCOFF YO

Fondasyon Frè Luckson « Zòn Pa Fè Moun » pote presizyon sou enfòmasyon ki fè konnen Direksyon Santral Polis Jidisyè, DCPJ, ta konvoke responsab fondasyon an apre liberasyon plizyè otaj nan Kenscoff.

Nan yon kominike li pibliye 5 septanm 2026, fondasyon an fè konnen enfòmasyon sa a pa egzak. Dapre dokiman an, Frè Luckson Jean pa t resevwa okenn konvokasyon nan men DCPJ.

Responsab la konfime DCPJ te rele li nan telefòn jedi 3 septanm 2026. Objektif apèl la, dapre esplikasyon li, se te jwenn enfòmasyon sou moun ki te libere yo. Enstitisyon polis la te bezwen konnen non yo, laj yo ak lòt detay ki kapab ede idantifye yo.

« Se pa t yon konvokasyon. Se te yon apèl pou yo te jwenn enfòmasyon sou moun ki te libere yo », se sa Frè Luckson Jean deklare.

Nan dat 28 out 2026, Frè Luckson Jean te patisipe nan demach ki te mennen nan liberasyon plizyè moun yon gwoup ame te kenbe kòm otaj nan Kenscoff. Entèvansyon sa a te atire anpil atansyon nan laprès ak sou rezo sosyal yo.

Fondasyon an mande medya yo ak itilizatè rezo sosyal yo pou yo verifye enfòmasyon yo anvan yo pataje yo. Dapre responsab yo, verifikasyon an kapab limite konfizyon ak move entèpretasyon sou dosye a.

Fondasyon « Zòn Pa Fè Moun » fè konnen li rete disponib pou kolabore ak DCPJ ak lòt otorite konsène yo, nan respè lalwa ak pwosedi ki etabli yo.

Òganizasyon an raple tou li travay nan domèn edikasyon, asistans sosyal, akonpayman timoun, sipò pou fanmi ki nan bezwen, distribisyon manje ak ankadreman jèn yo.