MICHEL SOUKAR REJTE TOUT ENPLIKASYON NAN YON KONPLO KONT JOVENEL MOÏSE

Istoryen Michel Soukar pote klarifikasyon apre non li te site pami temwen potansyèl defans Christian Emmanuel Sanon nan pwosè k ap dewoule Ozetazini sou dosye asasina ansyen prezidan Jovenel Moïse.

Soukar demanti nenpòt enplikasyon nan yon pwojè konplo, ranvèsman pouvwa oswa asasina Jovenel Moïse. Dapre li, rankont li te genyen ak Christian Emmanuel Sanon yo te ra e yo te konsène sèlman liv ak sijè ki gen rapò ak istwa peyi Dayiti.

Istoryen an fè konnen li pa t patisipe nan okenn diskisyon sou yon pwojè politik oswa yon aksyon ki ta vize ansyen chèf Leta a.

Fèt ke non Michel Soukar site kòm yon temwen potansyèl pou defans lan pa vle di lajistis ameriken akize li oswa konsidere li kòm yon moun ki enplike nan asasina a. Defans lan kapab rele yon temwen pou bay presizyon sou rankont, konvèsasyon oswa lòt enfòmasyon ki kapab itil nan prezantasyon dosye li.

Klarifikasyon sa yo fèt pandan pwosè Christian Emmanuel Sanon ap kontinye devan tribinal federal nan Miami nan kad dosye asasina Jovenel Moïse, ki te fèt nan rezidans prive li nan Pèlerin 5 nan lannuit 6 pou rive 7 jiyè 2021.