SAMIR HANDAL NAN DOSYE ASASINA JOVENEL MOÏSE: LAJISTIS AMERIKEN METE AKSAN SOU SIPÒ FINANSYE AK LOJISTIK

MIAMI, 29 septanm 2026. Biznisman ayisyen Samir Handal fè pati moun lajistis federal ameriken akize nan kad ankèt sou konplo ki te mennen nan asasina Prezidan Jovenel Moïse, 7 jiyè 2021, nan rezidans prive li nan Pèlerin 5.

Dapre Depatman Jistis Etazini, Handal fè fas ak akizasyon federal ki gen rapò ak konplo pou touye oswa kidnape Jovenel Moïse. Dosye lajistis la konsantre sou wòl diferan moun ki ta patisipe nan finansman, preparasyon ak sipò lojistik operasyon an.

Pandan pwosedi devan tribinal federal nan Miami, pwokirè yo prezante Handal kòm yon moun ki ta bay Christian Emmanuel Sanon ak lòt moun ki enplike nan konplo a plizyè fòm sipò. Dapre akizasyon lajistis la, sipò sa yo ta gen ladan lojman, manje, gaz, ekipman kominikasyon, minisyon ak zam.

Pwokirè yo fè konnen tou Christian Emmanuel Sanon ta dwe Handal anviwon 4 milyon dola nan kad relasyon biznis ant de mesye yo. Lajistis soutni Handal ta espere jwenn yon pòs diplomatik si Sanon te rive pran pouvwa ann Ayiti.

Sepandan, gen enfòmasyon k ap sikile ki fè konnen Handal ta depanse 4.4 milyon dola pou finanse asasina Jovenel Moïse epi li ta finanse manifestasyon kont ansyen prezidan an. Jiska prezan, dokiman ofisyèl nou verifye yo pa pèmèt Haitian Info TV prezante de deklarasyon sa yo kòm reyalite .

Samir Handal rete yon akize. Akizasyon lajistis federal yo poko reprezante yon kondanasyon. Se devan tribinal la pwokirè yo ap gen pou prezante prèv yo, pandan defans Handal gen dwa konteste akizasyon ak eleman gouvènman ameriken an prezante.

Haitian Info TV ap kontinye suiv evolisyon dosye a epi verifye nouvo enfòmasyon ki soti nan pwosedi federal yo.

Sous: Depatman Jistis Etazini ak pwosedi Tribinal Federal Sid Florid.